ZLP awm dan tur sawiho a ni

ZPM party hruaitute leh ZPM Legislature Party member-te chu nimin khan an ṭhukhawm a, MLA atan Lalduhoma lak luh a nih leh tâk avangin ZPM Legislature Party-a awmho dan tur an sawiho.

ZPM president mawhphurhna la mektu K Sapdanga, vice president chuan, ZPM leader Lalduhoma chunga thil thleng chu tawrh a hautak hle tih sawiin, "Duh thlan tur awm mah se thlan ngaihna a váng hle. A thlavâng hauh tura law court thlang loa mipui court kan thlang hi kan fin vang a ni lo a, Pathian remruat a nih ngei kan ring," a ti.

Mizoram politics chu lalna leh thuneihna inchuha inbeihna, hmanraw chhe ber pawh hman a thian vekna ni maia ngaih a ni ṭhin tih sawiin K Sapdanga chuan, "He ngaihdan hi mipui hian an hnâwl ngam tawh tih tun by-election result-ah hian a rawn inpuang ta niin kan hria. Serchhip bial mipui hi zirtirtu hmahruaiah an ṭang ta ni berah kan ngai a, ram pum mipuite'n an hniakah kan zui ngei ang tih kan ring," a ti a; 'Kan pawl candidate a nih chuan uṭawk pawh...' tih ngaihdan chu mipuiin an kal pêl meka a lan thu a sawi.

ZPM Vice President chuan, an party chu inpumkhat ṭha lo leh inlungrual lo anga puh an ni ṭhin tih sawiin, "Inlungrual leh inpumkhatna chungchanga kan khingpuite min puhna zawng zawng chu by-election boruak hian a rawn hrilhfiah ta. Kum 2023-ah mipuiin 'Kalphung thar, mipui sorkar' an tundin phawt chuan, kaihruai turin kan hotupa hi Pathianin thuneitute leh Serchhip bial mipui hmangin training a peah kan ngai. Kan Val Upate pawhin rem min tihsak ngei kan ring a ni," a ti.

ZPM party chuan an leader Lalduhoma, MLA atan lak luh leh a ni ta chu lawmawm an tih thu leh duhsakna sang ber an hlan thu an tarlang.