Internet ṭha zawk awm dan tur sawiho

Information & Communication Technology (ICT) minister Robert Romawia Royte hoin nimin khan sorkar leh company hotute'n video conference hmangin Mizorama inbiakpawhna (mobile phone) leh internet ṭha zawk a awm theih dan tur an sawiho.

Robert Romawia Royte chuan, sorkar department-te'n internet leh telecommunication chak ṭha zawk an mamawh tih sawiin, "Covid-19 léng avangin mipui kan inkhung mek a, zirlaite'n online class an neih reng bakah, online exam atan internet connectivity tihṭhat vat a ṭul," a ti a; Union Communication and IT minister Ravi Shankar Prasad hnenah Mizorama telecommunication system tichangtlung tura ngenna DO letter a ziah thu a sawi.

Mizorama mobile phone leh internet pe chhuaktu (service provider)-te chu ṭang leh zual tura a duh thu leh harsatna an tawhte chu bawhzuisak a inhuam thu sawiin Minister chuan, "Covid-19 inkhuahkhirhna pawhin in hnathawh pangngai a tikhailak lo a, harsatna in tawh chuan ICT department-ah hriattir zel ang che u," a ti a; Mizoram khaw hrang hrangte chu service provider-te hnathawh tibahlah loa ṭawiawm zel turin a sáwm.

Ṭhutkhawma an tarlan danin, Mizoramin internet connection a lâkna pui ber PGCIL chuan tunah hian Mizoram pumpui tan gbps 200-a chak bandwidth a pe mek a, online class leh ṭul dangah internet hman nasat a nih tak hnuah 100% hman zawh vek ṭhin a ni a, internet hmangtute'n harsatna an tawh phah ṭhin. PGCIL chuan gbps 100 bandwidth bun belh turin hma a la mek a, thla hnih/khat hnuah bun zawh an inbeisei a ni.

Video conference-ah hian ICT secretary Lalramsanga Sailo, Aizawl DC Dr Lalhriatzuali Ralte, Department of Telecommunications leh ICT department official te, BSNL, Airtel, Jio, Vodafone hotu te, PGCIL, Indus, Bharti leh local internet service provider aiawhte an tel.