Ruahmanna siam turin LTF-te ngen

May 13, naktuka Aizawl khawpuia dawr hawn dan turah Aizawl DC Dr Lalhriatzuali Ralte chuan nimin khan thuchhuah a siam a; local task force-te chu an veng ṭheuhah chawhmeh zawrhna hmun remchangah ruahman turin a chah.

Bawrhsap chuan, mahni veng péla veng danga thil lei tura kal loh theih ni se sorkarin a duh thu tarlangin, "Loh theih loh thila veng danga kal a ngaih chuan, an chhuahna LTF leh an va kalna tur LTF-te inberáwnin ruahmanna siam tur a ni," a ti.

DC tarlan danin, wholesale dawr pan ngai emaw, a hlawma bungraw lâk mamawh emaw an awm chuan LTF-ah inhriattir tur a ni a, an mahni veng hnaih berah mamawhte chu lam tur a ni. Ruahman dan chuan, veng danga bungrua a hlâwma lâk a ngaih chuan, AMC ward I-X chhunga mite'n zing dar 7 aṭanga chhun dar 12 inkarah an la ang a, ward XI-XIX chhunga mite'n chhun dar 12 aṭanga tlai dar 5 inkarah an la thei bawk ang.

Phai lam aṭanga chawhmeh lo lutte chu Commerce & Industries department (Commerce Wing) ruahmannain wholesale market building, Ngaizel, Kulikawn aṭangin sem darh ṭhin a ni ang dawn a, SOP ṭha taka zawm a nih theih nan Kulikawn LTF chu a ṭul anga ruahmanna siam tura ngen an ni.