Lalrinliana Sailo-in Assembly Speaker zahawmna a tihniam - ZPM Ṭhalai
ZPM Ṭhalai chuan nimin khan thuchhuah siamin, MLA aṭanga Lalduhoma bàn leh thlan tlin a nih leh hnua lak luh dana speaker Lalrinliana Sailo chêt dan chu Assembly Speaker zahawmna tihhniamnaa an ngaih thu an tarlang.
ZPM ṭhalaite chuan, MLA atan Lalduhoma nimina lak luh a ni leh ta chu lawmawm an tih thu an sawi a; chutih rualin, Speaker-in MLA aṭanga Lalduhoma a bàn dan leh a lâk luh leh danah Speaker tih atana mawi lo tam tak awma an hriat thu an tarlang a ni.
State hrang hrangah MLA bàn leh lak luh dan enin, Speaker-in zahawm takin a kalpui ṭhin tih sawiin ZPM ṭhalaite chuan, "Pu Lalduhoma MLA aṭanga bàn a nih dawn erawh chuan nasa taka puang lâwkin, Youtube thlengin live-a tihchhuah a ni a, Pu Lalrinliana Sailo-in a awmna party hriat tak maiin a insawifiahna thui tak ngaihthlak a ni," an ti.
ZPM Ṭhalai chuan, MLA atan Lalduhoma lak luh a nih dawnah pawh Youtube-a live theih tura ruahmanna siam a nih thu sawiin, "Zahawm tak leh ṭha taka la lut mai lo a, ZPM a bei leh chiam mai hi pawi kan ti a, Pu Lalrinliana Sailo hian tun MNF ministry-ah hian Speaker zahawmna a hnûk hniam hle a ni," an ti a; Speaker chêt dan chu pawi an tih thu leh tun hnuah zahawm taka thil ti ṭhin tura an duh thu an tarlang.
ZPM ṭhalaite chuan, Lalduhoma thlang tlingtu Serchhip bial mipui chungah an lawm thu an tarlang a; Lalduhoma leh a bial mipuite an lawmpui thu an sawi bawk.