Khawl ṭha zawka bawlhhlawh sâwngbàwl tum Bawlhhlawh i thliar hrâm ang u - Aizawl Mayor

Aizawl mayor Lalrin­enga Sailo chuan, kháwl ṭha zawk leh chang­tlung zawka bawlhhlawh sâwngbàwl turin hma an lâk thu a sawi a, bawlhhlawhte thliar hrâm hrâm turin mipui a ngen.

Vanglaini palai zawhna chhangin Lalrinenga Sailo chuan, bawlhhlawh mumal zawka sawng­bawl turin theihtawp an chhuah thu a sawi a, "Tuiriala Solid Waste Management Centre (SWMC) hi March khan SIPMIU chuan min hlàn nã a, a tak taka inhlan tawp theih lohna chin a awm. A enkawlna tur pawisa eng emaw zat an la kawl a, December 2021 thleng hi an kut a ni," a ti.

Mayor chuan, AMC nodal department UDPA changtu Deputy Chief Minister hoa meeting-ah mumal zawka SWMC inhlan a nih theih nan Coordination Committee din a nih thu sawiin, "Committee-ah hian UDPA leh AMC aiawhte an tel a, anni hian mumal zawka SWMC inhlan dan turah ruahmanna an siam ang," a ti a; inhlan a nih hma chuan SWMC chu SIPMIU-in an enkawl a ngaih thu a sawi.

Lalrinenga Sailo chuan, bawlh­hlawh sawngbawlna khawl lian zawk, boruak chhia tichhuak si lo te, bawlhhlawh thliar hran­na hmanruate leh plastic sawngbawl­nate lei an rilrûk thu a sawi a, "Company hrang hrang kan dawr vel mek. Plastic bik chu SWMC thlenpui kher loa Aizawlah a lâk khawmna siamte kan rilrûk a, plastic bik phur tur truck ngaihtuah kan tum," a ti.

SWMC-in Aizawl khawpui bawlhhlawh a dâwl zo tawh lo nia sawiin Lalrinenga chuan, "Hmun dang a rang lama kan ngaihtuah a ngai. Kan khawpui bawlhhlawh hian a tam hneh tawh a, kan hnawh zel chuan a ramah hian a leng dawn lo a, sawngbawl turin manpower (thawktu)-in a daih tawh lo. Trip 100-ah trip 10 vel thliar theih a ni chauh," a ti a, AMC hmabak a ko dawn hle niin a sawi.

Lalrinenga Sailo chuan, AMC inthlan dawna party ṭhenkhat au hla avangin mipuiin bawlhhlawh an thliar mumal tawh lo nia sawiin, "Party ṭhenkhat sawi kha a dikna chen a awm. A hmunhmain min dàwl zawh loh avangin hmun khata bun chin a awm a, chutih rualin, an thliar sa thlap chuan thliar hran a awlsam phah. Awmze nei zawka kal zel kan tum a, mipui pawhin bawlhhlawh thliar uar leh se kan duh," a ti.

Aizawl Mayor sawi danin, tun dinhmunah chuan bawlhhlawh paihna tura ruahmanna chhakah SIPMIU-in hmun an laih zàwl belh a, chutah chuan bawlhhlawh paih a ni ṭhin. Bawlhhlawh thliar a nih loh avang leh thawktu indaih loh avangin trip 100-ah trip 10 vel bak thliar hman a ni lo a, trip 90 vel chu sawngbawl lohin a awm ṭhin a ni.