Raw chi supply tur zawnna tender Horticulture department-in a chhuah

Horticulture depart­ment chuan May 7, 2021 khan tender notice tichhuakin, raw (rua) chi supply tur zawnna tender an chhuah. Tender chháng duh tan June 1, 2021 thleng chhànna thehluh theih a ni.

Horticulture depart­ment-in tender notice a tihchhuaha a lan danin, raw chi supply tur chu Raw-mi chî (Dendrocalamus Sikkimensis) a ni. Tender chháng duh tan kumin June 1 chhun dar 12 thleng thehluh theih a ni a, June 1-ah vêk technical bid hawn tur niin, financial bid chu June 2-ah hawn a ni ang.

Raw chi supply tur chu Socio Economic Development Policy (SEDP) leh National Bamboo Mission (NBM) hnuaia area expansion scheme atan a ni a; SEDP hnuaiah raw chi 15,000 leh NBM hnuaiah raw chi 25,000 supply tur a ni.

Raw chi supply tur chu a hrisel ṭha tur a ni a, centimetre 30 aia hniam lo tur a ni. Inpek chhàwnna velah a chhia a awm chuan a thlàwnin a supply-tute'n an pek leh a ngai dawn.

Horticulture depart­ment hian June 3, 2020 khan mau/ raw chi supply-na tur tender an lo chhuah tawh a, chumi ṭum chuan Dendrocalamus Brandisi leh Dendrocalamus Latiflorus chi supply tur zawn a ni. Chhangtu pakhat chiah a awm a, chhangtu awm chhun Growmore Biotech chu supply tir a ni.

Growmore Biotech-in tender an chhànnaa an tarlan dan chuan, mau/rua chi supply tur an neih chu Dendrocalamus Brandisii 1,00,000 a ni a, ft. 2-a sáng a ni hlawm. Tender hmanga mau/rua supply tur zawn tho Dendrocalamus Latiflorus erawh an nei lo.