Covid-19 laka invênna vaccine Second dose lâk hun tidanglam

Sorkar laipui chuan Covid-19 laka invènna damdawi (vaccine) second dose lâk theih hun a tidanglam a; first dose lâk aṭanga ni 28 hnua second dose lak tura tih ṭhin chu ni 48-52 hnu­ah lak tura tih a ni. Hemi chungchangah hian sorkar laipui chuan nimin khan thupek a tichhuak.

Vanglaini palai zawhna chhangin state immunisation officer Dr Lalzawmi chuan, May 11, 2021 thleng kha chuan Covid vaccine chu first dose lak aṭanga ni 28 hnuah second dose lak theih a nih thu a sawi a, "Vawiin (Nilaini) khan sorkar laipuiin second dose lâk theih hun a rawn tidanglam thut a, hei vang hian vaccine la turin mi tam tak an kal thlawn a ni. Ngaihdam kan dil e," a ti.

Covid-19 vaccine hi India ram hmun dangte rualin Mizoramah pawh January 16, 2021-ah pek ṭan a ni. May 11, Thawh­lehni thleng khan mi 2,28,713 hnenah first dose pek tawh niin, mi 51,260 hnenah second dose nen pek kim tawh a ni a; vaccine pek tawh zawng zawng chu dose 2,79,973 a ni.

May 11 bikah mi 1,232 hnenah first dose pek niin, mi 1,610 hnenah second dose pek a ni a, pek zawng zawng chu dose 2,842 a ni.