KHAWTHLIR

Gas sem leh tan
Mizoram Indane Distributor Association-te'n Covid-19 kài hlauh vang leh kài darhtu nih hlauh vanga May 5, 2021-a gas sem lo tura thutlukna an siam tawh chu nimin khan an sût a, nimin aṭang khan gas sem an chhunzawm leh nghal.

Thisen pe
Mission Foundation Movement (MFM) School of Nursing chuan nimin khan International Nurses Day pualin Berawtlanga an hmunah thisen pek an huaihawt a, mipa 16 leh hmeichhia 12-te'n Aizawl Civil Hospital tan thisen unit 28 an pe.

Idd Ul hmang dawn lo
Aizawl Mosque Committee chuan thuchhuah siamin, Muslim hun pawimawh, May 14, 2021-a thleng tur Idd Ul Fitre chu Covid-19 léng avangin Mizoramah chuan an hman dawn loh thu an tarlang. An member-te chu zing dar 7:30 - 8:30 inkarah Covid-19 laka Mizoram a him theih nan an awmna hmunah ṭawngṭai turin an ngen a ni.

Thiin chhar
Lalparvula (37) s/o R Ramliana (L), Seling chu nimin zing dar 7:20 vel khan Champhai lam panna kawngpui thlang metre 100 vela hláah thia chhar a ni. Thu dawn danin, Lalparvula hi May 11, Thawhlehni chawhnu dar 2:30 vel khan scooty-in a chhuak a, Thawhlehni tlai leh zana ṭhenawm khawveng leh YMA hruaitute'n an zawn hnuah nimin zing khan thiin an hmu a ni.

Zanriah buatsaih
Minister of state Robert Romawia Royte chuan state páwna Assembly inthlana duty-a kal police zinga Covid-19 vei, Rengdil, Thenzawl, Khawzawl, Lunglei leh Serchhip Covid care centre-a awm mekte tan nimin khan zanriah a buatsaih. Zanriah buatsaihna tur hi Robert Romawia chuan an Commandant ṭheuhte hnenah a thawn a ni.

Vawk lak luh khap
Khawzawl DC Zothanmawia chuan nimin khan thupek chhuahin, district páwn aṭangin vawk, vawksa rêp leh vawksa aṭanga thil siamte lâk luh leh khawpui chhunga vawk dam leh damlo hralh emaw talh a, a sa lâk chhuah khap a nih thu a puang.