Kawlkulhin NH-6 siamtute an dang
National Highway-6 siam dan turah Kawlkulh NGO Coordination Committee chuan an khua paltlang loa kawng siam tum a ni chu duh loin, kawng siamtu NHIDCL-te Puilo péngah gate siamin an dang.
NHIDCL hian Puilo khaw ramah camp siamin kháwl leh bungruate bun an tum a; hma an lakna chu Kawlkulh NGO-in remti loin, Puilo pêngah gate siamin an dang a ni.
Vanglaini thu dawn danin, Khawzawl DC Zothanmawia chuan NH-6 kawngpui siam tur chungchangah May 11, Thawhlehni khan Kawlkulh VC-l leh VC-ll, tlawmngai pawl hrang hrang leh Puilo VC leh YMA hruaitute a kâwm.
Khawzawl DC chuan, kawng sialna tur enfiahnaah hmun hmingte awm mah se, khua a tlawh ngei ang tihna a nih loh sawiin, Khawzawl hming pawh chuang tho mah se, Khawzawl khaw chhung a tlawh dawn loh thute a hrilh a; Kawlkulh khawtlang hruaitute chu Puilo pénga gate an siam chu ṭhiat tur leh dan phal loh a nih thu hrilhin, an chungchang chu sorkarah thlen a nih tur thu a sawi.
Kawlkulh NGO Coordination chairman R Laldingliana chuan Vanglaini palai zawhna chhangin, NH-6 chu an khua paltlang ngei tura an ngaih thu a sawi a, "Union minister for Road Transport & Highways Nitin Gadkari chuan Twitter-ah cheng nuai 3743.9 sêngin Dulte-Kawlkulh NH-6 kawngpui double lane-a thawm ṭhat hna thawhna tur pawm a nih thu a post. Mahse, hemi chungchang hi sorkarin a bawhzui lo a, Dulte-Kawlkulhah kaltir loin, by-pass road-ah kaltir an tum niin kan hria," a ti a; an khaw paltlang loa kaltir tumna chu dodal zel an tum thu a sawi bawk.
Kawlkulh leh Dulte Joint NGO Coordination Committee chuan thuchhuah inṭâwm siamin, "April 4, 2021-a Union minister for RTH Nitin Gadgari-a'n 'Upgradation – 2 lane with paved shoulders of a section of Dulte-Kawlkulh road (international corridor) of NH-6 in the state of Mizoram was approved with a budget of Rs. 374.39 crore' tia a tweet ang ngei hian Dulte leh Kawlkulh inkar hi a rang thei ang bera thawk ṭan turin kan phût. Hna thawh ṭan a nih hma chuan NH-6 by-pass-na atana hnathawhna hmanrua leh a kaihhnawih hrang hrangte Kawlkulh leh Dulte paltlanga lâk luh kan remti lo," an ti.