MLA-in Covid-19 veite ṭanpuina a pe

Rubber & Allied Crops Development Board vice chairman Lalrinsanga Ralte, MLA chuan nimin khan Covid-19 veite enkawlna hmun, Jordan Centre, Seṭhawn Covid Care Centre (CCC) a tlawh a, hripui vei awm mekte tan thil chi hrang hrang a pe.

Lalrinsanga Ralte chuan, hripui donaah Mizoram sorkarin theihtawp a chhuah thu sawiin, "India ram puma Covid-19 vaccine indaih lohna karah Chief Minister leh Health Minister hmalakna avangin kum 18-44 inkarte'n vaccine a thlawna an lâk thuai thei nan ruahmanna a kal mek," a ti a, ventilator eng emaw zat lei belh mek a nih thu a sawi.

MLA hian Jordan Centre CCC-a hripui vei enkawl mekte chu damdawi lam kaihhnawih hmanraw chi hrang hrang, tui in tur leh tui tihthianghlimna leh hmai tuamnate a pe a; Kolasib District Hospital-a medical superintendent Dr Doris Lalnunmawii Sailo hnenah Rs. 10,000 a hlàn bawk. MLA hi Dr Doris Lalnun-mawii Sailo bakah, Jordan Centre CCC-a medical i/c Dr C Vanlalhlimpuia'n a ṭawiawm a ni.

Serlui bialtu MLA hian a bial chhunga Rengtekawn leh New Builuma village task force duty-na hmun a tlawh bawk a; inkhàrkhip vanga khawtlanga harsatna awmte chu sorkara thlen zel tura chahin, "Hripui vanga khawtlangah buaina leh harsatna a thlen a, eizawnna hrang hrang a nghawng nasa. Hri hian inthinhrikna leh indemtawnna ni loin, induhsaktawna leh inhmangaihna, inṭanpui tawn duhna thinlung hring chhuak ngei se ka duh," a ti. VTF-te hnenah pawisa, hand sanitiser litre 5 leh hmai tuamna 200 a pe a ni.