Maubawka in kâng tuarte an tana insak hlan a ni

March 13, 2021-a Maubawk, Aizawla in kâng tuarte tana Maubawk Joint Committee-in in an sak, Assam type in pali chu nimin zing khan a neitute hnenah an hlân.

In hlanna inkhawm hi Maubawk Local Council chairman PC Lalawmpuia'n a kaihhruai a; Maubawk Joint Committee chuan, in kâng tuarte tana in sak lehna atana thâ leh zung sengtu te, veng ṭhenawmte leh Mizoram Mistiri Association te, pawl leh mimal ṭanpuina petu zawng zawng te, kâng ṭhelh a nih laia rim taka thawktu Fire & Emergency-te chungah an lawm tak zet tih an tarlang.

In kâng tuartute tan hian Maubawk Joint Committee chuan Assam type in pali, a dung ft. 24 leh a vâng ft. 12-a zauin an sa a; in kâng chhe vek lo pali an thawm ṭhatsak bawk.

Maubawkah hian kumin March 13 zing khawvar hma khan chhungkaw 15 luah lai in pariat a kâng a, kângmei tuartute tana Maubawk Joint Committee-in ṭanpuina Rs. 79,88,863 an dawng. Sum an dawn aṭangin kâng tuartute in sak nan leh an mamawh ṭul dang atan Rs. 15,38,048 hman a ni a, Central YMA aṭanga an dawn Rs. 27,13,305.50 chu kâng tuarte hnenah an hlân nghal. Sum la hman lohte pawh a rang thei ang bera hlan leh an tum a ni.