AMC EC-in CCC-a bawlhhlawh enfiah

Aizawl Municipal Corporation (AMC) executive councillor (i/c Solid Waste Management) Laltlanzova Khiangte chuan nimin khan SAI Hostel Covid Care Centre (CCC), Mission Vengthlanga bawlhhlawh lâk khawm dan a en.

Laltlanzova Khiangte chuan, AMC-in local council nen ṭanghoin public private partnership (PPP) mode-in Aizawla bawlhhlawh lâk khawm ṭhin a nih thu leh Covid-19 donaah theihtawp chhuaha hmalak mek a nih thu a sawi a, "CCC hrang hrang bawlhhlawh aṭanga hripui inkai chhâwn a nih lohna tura Health department-in bawlhhlawh sâwngbawl dan tur inkaihhruaina a siamte chu CCC enkawltute'n ṭha taka an zawm a ngai," a ti.

Executive Councillor chuan, bawlhhlawh la khawmtute'n ngaihngam taka CCC-a bawlhhlawhte an lâk khawm theih nan CCC enkawltute fimkhur turin a chah a; quarantine centre leh CCC/CCCC bawlhhlawhte chu ni tin a hrang zelin bawlhhlawh ipa khung zel tur a nih te, disinfectant-a phuh vek tur a nih te, darkar 72 hnuah chauh bawlhhlawh chu motor-in a lak ṭhin tur thute a sawi.

Laltlanzova Khiangte-in a sawi danin, community quarantine centre 88, Covid care centre pakua, community covid care centre 11 leh paid quarantine facility 18-a bawlhhlawhte AMC-in lâk khawmin a paih mek a; bawlhhlawh lâk khawm nan AMC motor pali bakah, mimal motor hman ṭhin a ni.