Ni 23 chhungin Rs. 3,31,810 chawitir

April 20, 2021 aṭanga Aizawl khawpui leh district headquarters bika inkhuahkhirhna kalpui a nih aṭanga ni 23 chhung, May 12, nimin thleng khan Aizawl district-ah Covid-19 executive duty-te'n mi 1,400 vel an man tawh a, pawisa chawitir tlingkhawm chu Rs. 3,31,810 a tling.

Mizoram sorkarin district magistrate-te Covid-19 appropriate behavior (hripui kái lo tura khawsak dan tur) kengkawh tur leh Covid-19 dona kawnga hmalakna hrang hrang atan duty tur sorkar hnathawkte ruat turin a ti a, Aizawl District Magistrate chuan executive duty tur mi 460 a ruat a ni.

Aizawl district-a executive duty mi 460-te chu pawl 92-ah ṭhen an ni a, páwl pakhatah mi panga zel an awm. Chawlhkar tin Thawhṭanni aṭanga Zirtawpni inkarah zing dar 9 aṭanga tlai dar 5 chhung an duty ṭhin a, Inrinniah zing dar 5 leh chawhnu dar 2 inkarah an duty bawk a, Pathianni-ah erawh chuan an châwl.

Vanglaini thu dawn danin, executive duty-te chu batch-ah an inṭhen bawk a, batch khat chu chawlhkar khat zel an duty ṭhin. May 15, Inrinni thleng duty dan tur siam a ni a, sorkarin ṭul a tih dan azirin duty turte ruat zel tur a ni.

Aizawl district executive duty-te'n inkhuahkhirh leh inkhârkhip laia inkaihhruaina zâwm lo an man tlangpui chu - hmai tuamna (mask) vuah lo, physical distancing zâwm lo, vantlang hmuna chil chhâk, inkhawmnaa zai, inkhung hran hun a zawh hmaa chhuak ru, phalna nei loa dawr hawng, danin a phût anga sorkar official-te thawhpui duh lo, LTF lehkha tel loa chhuak, dawra hming ziahna vawng lo, quarantine facility-a awm laia mi dang tana him lo zawnga khawsa leh truck driver negative certificate nei lote an ni.