Oxygen leh ventilator-ah harsatna A la awm rih lo - Health Minister
Health & Family Welfare minister Dr R Lalthangliana chuan, tun dinhmunah chuan Zoram Medical College (ZMC)-ah oxygen leh ventilator-ah harsatna a awm rih loh thu a sawi.
Vanglaini palai zawhna chhangin Health Minister chuan, NESID aṭangin Oxygen Generating Plant atan Mizoram chhim lam leh hmar lam bakah, district ṭhenkhatah ruahmanna kalpui mek a nih thu a sawi a, "Mahse, Covid-19 avangin Mizoram páwn aṭanga mi thiam chah luh a buaithlak a, installation buaipuinaah harsatna kan tawh phah. ZMC lama kan oxygen leh ventilator chungchangah, boruak danglam tak a awm a nih loh chuan thlaphànna tur a la awm loin kan hria," a ti.
Dr R Lalthangliana chuan, kum 18-44 inkarte hnena Covid-19 vaccine pek hun tur hriat theih a la ni lo tih sawiin, "Theihtawp chhuahin hma kan la ve reng. Mahse, India ramah kum 18-44 inkar an tam em a, kum 45 chin chung lam pek reng a ngai tho nen, a siamtu lamin an siam hneh lo. Central-ah kan mamawh dan kan thlen reng a, anni lam pawhin a siamtute an nawr reng a ni," a ti a; vaccine siamtute hnenah Mizorama kum 18-44 inkarte vaccine pek tur an hriattir (order) tawh thu a sawi.
Vaccine pek danah sorkar laipui an khirh telh telh thu sawiin Minister chuan, "Sorkar laipui chuan vaccine pek hmasak tura ruahmanna an siam anga pe lo state an awm a nih chuan an dawn tur tihtlem hial a tum. Chuvangin, mipui mamawh phuhrûk hna thawktu hrang hrang vaccine lak duhte pawh pek ṭha kan ti viau a, mahse, kan pe thei lo. Heng ho hi kum 18-44 inkar hnena vaccine pek tur a lo thlen hunah ngaih pawimawh hmasak an ni dawn," a ti.
Health Minister sawi danin, kum 45 chin chung lamte vaccine la pek zel a ni a, chutih rualin, a siamtu company-in India ram mamawh an siam hneh loh avangin pek chak theih a ni lo a; Union Health Minister leh Secretary-te an dawr reng a ni. A tira hmarchhak state-te pek an tum loh Covid-19 damdawi váng leh man to Tocilizum ab chu an ngenna Union Health Minister-in a ngaih pawimawh avangin Mizoram pek ve a ni.
Dr R Lalthangliana chuan, ZMC-a TB laborartory hman a ngai tawh lo tih sawiin, "ICMR kan ngen angin Virus Research & Diagnostic Laboratory a thlawnin min pe a, hman mek a ni. VRDL-a thawk tur eng emaw zat pawh ICMR (Ministry of HFW)-in min tumsak bakah, ka dil angin RT-PCR test kit 25,000, cheng nuai 200 dáwn man a thlâwnin min pe a, kan lawm hle," a ti a; Civil Hospital, Lungleiah laboratory changtlung tak din an tum a, cheng nuai 781 hû DPR an peih tawh thu a sawi.
Health Minister chuan, SRH-ZMC-ah ringawt pawh inenkawlna a hautak hle tih sawiin, "Covid-19 vei leh medical staff dahna tur 100 chuang tun hnaiah ruahman belh a ni. Damlo zawng zawng enkawlna leh endikna te, PPE, ei leh in tur leh bàwl hlo dang zawng zawng atan ni khatah cheng nuai 20 vel sên a ngai. Tun ang renga kan kal chuan thla tin cheng nuai 600 sensoah kan hmang ziah dawn tihna a ni," a ti.
Health Minister sawi ṭhenkhat
1) Kum 18-44 inkarte hnena Covid-19 vaccine pek hun tur hriat theih a la ni lo
2) Vaccine pek danah sorkar laipui an khirh telh telh
3) Covid-19 damdawi váng leh manto Tocilizumab pek kan ni
4) SRH-ZMC-ah ni khatah cheng nuai 20 vel sên ziah a ngai
5) Civil Hospital, Lungleiah laboratory changtlung dinna atan DPR peih a ni tawh