Buhfai chungchang sawiho a ni

Food, Civil Supplies & Consumers Affairs (FCSCA) minister K Lalrinliana hoin a pisaah nimin khan FCSCA department hotute an ṭhu a, Covid-19 léng mek kara Mizoram mipuiin buhfai an chan tur ang an hmuh theih nana hmalak dan tur an sawiho.

Ṭhutkhawma tarlan danin, tun dinhmunah Mizoram hmun hrang hranga Supply kudamah buhfai a awm ṭha a, May 2021 chhunga buhfai sem tur quota pawh May 7, 2021-ah allotment tihchhuah a ni tawh. Retailer-te'n an quota ṭheuh a hun taka an lak chhuaha an sem theih chuan, hripui léng avangin buhfaiah harsatna a awm lo tura ngaih a ni.

Buhfai May 2021 quota sem rualin PMGKAY hnuaia National Food Security Act hnuaia awm - AAY leh PHH beneficiary-te hnenah a thlâwnin buhfai kg. 5 zel sem tum a ni bawk.