NE-a Covid-19 vei tlemna Mizoram leh Meghalaya

India hmarchhak state pariat zingah kum 2011 chhiarpui anga chhûtin Mizoram leh Meghalaya state-te chu Covid-19 hripui vei tlemna ber state a ni.

Sorkar thuchhuah tarlan danin, kum 2011 chhiarpui anga chhûtin, Mizoramah chuan May 12, Nilaini thleng khan mi 1,000 zelah Covid-19 vei mi pasarih hmuh chhuah an awm ang a ni a, hripui vei mek mi 1,000 zelah mi pahnih awm ang a ni. Covid-19 vei thi zat pawh mi 1,000 zelah 0.02 niin, hmarchhak state zingah a hniamna ber a ni.

Kum 2011 chhiarpui anga chhûtin, Sikkim-ah mi 1,000 zelah hripui vei mi 17 an awm a, Covid-19 vei tamna ber state a ni. Hripui vei mek pawh mi 1,000 zelah panga awm ang niin, hripui vei mek awm tamna ber a nih bakah, thihpui tamna ber state (0.29) a ni bawk.

Hmarchhak state zingah Assam, Tripura, Meghalaya leh Arunachal Pradesh-te chu kum 2011 chhiarpui anga tehin, mi 1,000 zelah Covid-19 vei mek awm tlemna state an ni a, mi 1,000 zelah mi pakhat enkawl mek an awm ang a ni.