Hmunnuam JAC-in sanctuary aṭanga Sai dah sawn phût

Hmunnuam Joint Action Committee (JAC) chuan thuchhuah siamin, Ngengpui Wildlife Sanctuary-a sai sual pakhatin an khaw tan harsatna a thlen ṭhin thu an tarlang a; sai chu May 2021 ral hma ngeia tih­hlum emaw, hmun danga dah sawn emaw an phût.

Hmunnuam JAC chuan, kum 5 kal ta aṭangin sai sualin an khaw mipuite thil neihte a tihchhiat bakah, mipuite rálṭi takin a siam ṭhin tih an tarlang a, "Mizoram sorkara thuneitute'n May 2021 ral hma ngeiin tihhlum emaw, hmun dangah min dahsak rawh se. Hun tiam chhunga an tihlum lo emaw, hmun him lama an sawn lo a nih chuan sai sual hian kut palh a tuar a nih pawhin mawh kan phur lo ang," an ti.

Sai sual hian April 29, 2021 khan Sialphelluia chêngkawl an khawrh lai Hnianghniangi w/o Vanropuia chu a bei thut a, a taksa hmuh tlak loh khawpin a sawisak thu sawiin Hmunnuam JAC chuan, "Sialphellui leh a bul vel hi Hmunnuam bakah khaw ṭhenawmte'n eizawnna atana kan hman ber a nih avangin kan kal lo thei lo a, sai sual hian mi tithlabár hle a ni," an ti a; Hnianghniangi chhungte chu zangnadawmna pe ngei turin Mizoram sorkar an phût bawk.