KHAWTHLIR

Thisen pe
College of Nursing, Synod Hospital chuan Nurses Week hman mek pualin May 11-13 chhung khan Synod Hospital blood bank-ah thisen unit 45 an pe a, petute hmeichhia 39 leh mipa paruk an ni.

CM Relief Fund
Former Legislators Association of Mizoram chuan Covid-19 donaa hman atan Chief Minister’s Relief Fund for Covid-19 ah nimin khan Rs. 1,50,000 an thawh.

Zokhawthar CCCC
Tun hnaiah Zokhawtharah Covid-19 vei an pun nasat avangin Champhai DC Maria CT Zuali chuan Zokhawthar Tourist Lodge chu community covid care centre (CCCC)-ah hman a ni dawn tih a puang. Zokhawthar CCCC-a awm turte chu mutbu leh mahni mamawh, awm man leh senso zawng zawng intum tura tih an ni.

DC-ah lirthei pe
CT Mawia, Kolasib Diakkawn chuan nimin khan Covid-19 donaa a ṭul apianga Kolasib DC office-in an hman atan Eeco van a pe a, bawrhsap Dr H Lalthlangliana hnenah chabi a hlân.

SRH-ah mi 13-in Ventilator hmang
State Referral Hospital (ZMC)-ah Covid-19 vei mi 138 an awm mek a, chu'ng zinga mi 17 chu ICU-ah awmin, mi 13 chu ventilator hmantir an ni. SRH-ZMC Bulletin tarlan danin, hripui vei SRH-a awm mek mi 138 zinga mi 17 chu nimina dah luh an ni a, ward hrang hrangah mi 121 an awm. Enkawl zingah ni 21 aia rei awm tawh mi panga leh ni 14 aia rei awm tawh mi 11 an awm a ni.

Balu order sût
Geology & Mineral Resources department chuan NH kawngpui zauh hna thawktu ABCI Infrastructure hnena thla khat atana Tuichang luia balu lâk phalna a pek chu nimin chawhnu khan a sût. Hei vang hian GMR order duh lohna lantirtu Save Tuichang Movement leh Hnahthial Ṭhalai Pawl chuan lungawi lohna lantir an titawp. Pawl pahnihte hian Tuichang lui chu May 10 aṭang khan an véng a, May 11 khan balu lâk phalna order an hâl a ni.