Hmun hrang hranga hripui vei enkawl zat

Sorkar thuchhuah tarlan danin, nimin tlai dar 3 thleng khan dedicated covid hospital - SRH-ZMC-ah hripui vei mi 153, Mizorama DCHC 14, CCC 42, CCCC 22 leh PCCC-ah Covid-19 vei enkawl lai mi 1,577 an awm a, mahni ina inenkawl mek (home isolation) mi 296 an awm bawk a; an vaiin mi 1,863 an awm.

Sorkar thuchhuah tarlan danin, SRH-ZMC-a ward-ah khum pangngai 85 leh ICU-ah khum 13 awmin, a vaiin khum 98 a awm a, chutih laiin, damlo 153 an awm a, khum awm zat aia 56-a tam an awm a ni.

Mizorama dedicated covid health centre (DCHC) 14-ah khum 154 leh ICU khum pahnih, a vaiin khum 156 a awm a; DCHC 14 zinga Sairang AYUSH Hospital-ah mi pahnih enkawl mek an ni.

Community covid care centre (CCCC) 22 awmin, khum 718 a awm a; CCCC 22 zinga 16-ah May 13 thleng khan mi 238 enkawl mek an ni. Covid care centre (CCC) 42 awmin, khum 2,300 a awm a; CCC 31-ah hripui vei mi 1,180 enkawl mek niin, khum ruak 1,115 a awm.

Aizawlah man chawia Covid-19 veite awm theihna paid covid care centre (PCCC) pahnih - State Guest House leh Tourist Lodge, Chaltlangah a awm a, khum 41 a awm. May 12 thleng khan hripui vei mi paruk an awm mek a, khum ruak 35 a awm a ni.

Covid-19 vei, mahni in lama inenkawl mek zingah Aizawl district-a mi tam berin, 86.42% an awm a; Serchhip district-ah 7.61%, Siaha district-ah 4.96% leh Lawngtlai district-ah 0.99% an awm. Lunglei, Champhai, Kolasib, Mamit, Khawzawl, Saitual leh Hnahthial district-ahte home isolation an awm rih lo.

Covid-19 vei enkawlna hmun hrang hranga nimin tlai dar 3 thlenga enkawl zat belhkhawm chu mi 1,863 a ni a, hei hi hripui vei mi 84 nimina chhuahtirte tel loin a ni. Chutih laiin, May 13 zinga Covid-19 report-ah hripui vei mek mi 2,033 an awm a, mi 84 an chhuah hnua tlai dar 5 report-ah chuan enkawl lai mi 1,949 an awm thung; 1863 leh 1949 inthlauhna chu 86 a ni.