MLA leh councillor-te che chhuak

MLA, AMC councillor leh ZPM hruaitute chuan Covid-19 léng kaihhnawihah nimin khan Aizawl khawpuia hmun hrang hrangah ṭanpuina an pe.

Lawngtlai East bialtu MLA H Biakzauva chuan nimin khan a bial chhunga VLTF-te hnenah Rs. 10,000 ṭheuh a pe. H Biakzauva chuan a bial mipuite chu Covid-19 laka an him tlan theihna atan sorkarin ruahmanna a siamte thuawi taka zawm zel turin a chah.

Aizawl North-ll bialtu MLA Dr Vanlalthlana leh AMC Ward-lll councillor C Lalchhandami te chuan nimin khan an bial chhunga veng panga - Laipuitlang, Ramhlun North, Ramhlun Venglai, Ramhlun Vengthar leh Ramhlun Sport Complex-a LTF duty-te an tlawh a; inkhàrkhip vanga chhuanchhamte hnena sem turin buhfai, dailuah leh kut tihfaina eng emaw zat LTF-te hnenah an hlân.

MLA leh Councillor-te hian Nazareth Hospital pawh tlawhin, PPE eng emaw zat an pe a; C Lalchhandami chuan a bial chhunga damlo harsa zualte hnenah pawisa eng emaw zat a pe bawk.

AMC Ward-XIV councillor Ramthanzauvi pawhin nimin khan a bial chhung Mission Vengthlanga SAI CCC -ah PPE eng emaw zat leh khawsik enna a pe bawk. SAI CCC-ah hian nimin khan enkawl lai mi 69 an awm a ni.

ZPM consultant F Rodingliana chuan AMC Ward-XVI chhunga a ṭula hman turin bialtu councillor R Lalawmpuii hnenah ṭanpuina sem tur pawisa eng emaw zat a pe a; R Lalawmpuii pawhin nimin khan a biala College Veng LTF hnenah Rs. 10,000, hmai tuamna leh hand sanitiser-te a hlan nghal a ni.