Covid-19 do laia mau chi supply-tu buaipui a inhmeh lo -ZPM Ṭhalai

ZPM Ṭhalai chuan thuchhuah siamin, Mizoram sorkar chu an duhsak zawngte hausakna tur kawng ngaihtuah aiin, hripui donaah nasa zawka hma la turin an phût thu an tarlang a; Covid-19 hripui avanga kan buai laia mau chi supply-tu zawn chu inhmeh lo an ti.

Covid-19 hripui vanga Mizoram pumah mipui an buai laiin 'Pathian leh kan ram tan' tih thupuia neitu MNF sorkar chuan May 7, 2021 khan mau ṭiak supply turin tender a chhuah tih sawiin ZPM ṭhalaite chuan, "A chhángtu tur hriat saa tender sorkarin a chhuah mai hi hripui léng kara tu emaw hausakna tura hmalakna pakhat ni maiin kan hria," an ti.

Mau ṭiak supply-tu tur zawnna tender chhuah taka a lan danin, mau ṭiak supply tur chu Mizorama tualṭo Raw-mi (Dendrocalamus sikkimensis) a ni tih sawiin ZPM Ṭhalai chuan, "Mau hi Mizoram tualṭo a nih avangin Mizoram hmun hrang hrangah hmuh tur a awm," an ti a; chutih rualin, mau duap, sâwngbâwl loh chuan awlsam taka ngêt mai thei a nih avangin Mizoram mipuiin an hman rim loh páwl a nih thu an tarlang.

ZPM ṭhalaite chuan, tun hnaia SEDP sum aṭangin kawng leh railing siamna atan cheng nuai 63 pek chhuahna order sorkarin a chhuah tih sawiin, "A mak kan tiin hriatthiam a har kan ti a, 'Sum kan harsa' tia hripui chhuanlamah siam a, sorkarin a hnuaia hnathawk hlawh hial îta a dil ruai laiin, sorkar hian a duhsak zawng hna pek nan chuan sum a nei hle a ni tih hi kan ngaihdan a ni," an ti.

ZPM Ṭhalai chuan, hmasawnna hna chu pawimawh viau mah se, nunna a hlut zawk avangin a loa awm thei loh hna a nih loh chuan hmasawnna hna aia nunna ngai pawimawh tur leh, sorkar sum neihte pawh Covid-19 dona atan hmang hmasa zawk turin Mizoram sorkar an ngen a ni.