Covid-19 do nan LADC-a thawkte ni 1 hlawh thawh turin ngen dawn

May 12, Nilainia Lai Autonomous District Council (LADC) chief executive member Manghmunga Chinzah hoa LADC Disaster Management & Relief Committee ṭhukhawm chuan, LADC sorkar hnuaia a ngheta thawkte chu an ni khat hlawh Covid-19 dona atan thawh tur leh MDC-te chu ni hnih hlawh thawh tura ngen an rêl.

LADC DMR Committee chuan, Lawngtlai district-a village task force-te ṭanpuina pek an rél a; medical lamte'n an hnathawhna kawngah hah leh chauh sawi loa theihtawp an chhuahna chu lawmawm an tih thu sawiin, "Indaih zawka hna an thawh theihna turin laboratory technician pathum, thla thum chhung atan rawih ni se," an ti.

Lawngtlai district-a Covid-19 vaccine pek kalpui meka thawktute a theih anga ṭanpui rêlin, "Ei leh bàr kawngah harsatna tâwk an awm a nih chuan theih ang anga buaipuia chhawmdawl ni se," an ti a; Covid-19 dona atan LADC-a chhiah tlingkhawm aṭangin Rs. 2,00,000 ngaihtuah an rêl bawk.