Admission fee la lo turin ngen

Peoples Conference party chuan, Covid-19 lêng avangin Mizoram sorkar hnuaia sikul zawng zawngah zirlaite aṭangin admission fee la lo a, a thlâwna admission tihsak vek turin Mizoram sorkar an ngen.

PC party chuan thuchhuah siamin, School Education department-in Covid-19 avanga zirna-in leh hostel-te khâr zui zel tur leh online hmanga school admission hawn theih tura ruahmanna a siam chu ṭha an tih thu an tarlang a, "Covid-19 leh a kaihhnawihin Mizorama chhungkaw tam zawkte harsatna nasa tak min thlen avangin, School Education hnuaia zirna-in zawng zawngah a thlàwna zirlaite admission tihsak vek turin Mizoram sorkar kan ngen a ni," an ti.