Bilkhawthlir PHC-ah ambulance hlàn

Serlui bialtu MLA Lalrinsanga Ralte chuan nimin khan a bial chhunga Bilkhawthlir Primary Health Centre (PHC)-ah ambulance a hlân.

Lalrinsanga Ralte chuan, Covid-19 léng vanga hmasawnna hna kalpuinaa harsatna karah Bilkhawthlir PHC-in hmasawnna hmel thar a hmu mek zel tih sawiin, "Ambulance hi Covid-19 donaa damlo phurh kual ngai te, ramri hnaiha screening point-a Covid-19 vei hmuh chhuahte CCC-a phurh nan leh khawtlang hriselna kawnga hman turin MLA-LADS hmangin ruahman a ni," a ti.

Bilkhawthlir VTF hruaitute chu chhuanchham an awm lo nan hma la tura chahin MLA chuan, "Keimahin chaw ei tur ka neih chhung chuan kan vengah ei tur nei lo chhungkua an awm tur a ni lo, tih rilru pu chungin, he inkharkhipna hun hi hmang ang u," a ti a; mi harsa zawk leh ni tin inhlawhfa chawpa eizawngte ngaihtuah hmasa turin khawtlang hruaitute a chah.

Lalrinsanga Ralte hian Bil­khawthlir North leh South, Saiphai leh North Chawnpui VTF-te a tlawh bawk a, hripui donaa a ṭula hman turin pawisa, hmai tuamna leh kut tihfainate a pe a ni.