Sorkarin kar khat chhung Total lockdown a pawtsei
Mizoram sorkar chuan Covid-19 darh zel avanga May 10, 2021 aṭanga total lockdown a puan, May 17 zing dar 4-a tàwp tur chu kar khat chhung atan a pawtsei. May 17-24, 2021 chhunga hman tur inkaihhruaina, Standard Operating Procedure (SOP) thar tihchhuah nghal a ni.
Covid-19 thawh hnihna a darh hnuah Mizoram sorkar chuan inkhuahkhirhna thupek a tichhuak a, chumi hnuah lockdown kalpui lehin, May 10 aṭangin total lockdown a puang. Total lockdown puan hnuah pawh Covid-19 vei hmuh chhuah an pung zel a, hei vang hian Mizoram sorkar chuan total lockdown a pawtsei leh ta a ni.
Vanglaini palai zawhna chhangin Covid-19 Medical Operational Team chairman Dr ZR Thiamsanga chuan, total lockdown chuan rah ṭha a chhuah ngei an beisei thu a sawi a, "Tualchhunga inkai darhna a lo nasa tawh em a, thawk leh khata lang chi a ni lo. Total lockdown rah chhuah chu kar leh lamah a lan theih kan beisei," a ti.
Dr ZR Thiamsanga chuan, inkhàrkhip bak hmanraw dang a awm loh thu sawiin, "Medical mite leh mipui lam pawhin total lockdown pawhsei hi ṭha kan ti tlangin ka hria. Khauh taka kan inkhuahkhirh loh chuan kan hmabak a thim lutuk ang tih a hlauhawm," a ti a, mipuite'n inkaihhruainate chu himna atan ṭha takin zâwm se a duh thu a sawi.
