Muallungthu VC-te'n ZMC tan ram an pe

Muallungthu VC chuan an khuaa primary school leh middle school ram bakah, Mauphir ram ṭin 50 hmun vela zau chu Zoram Medical College (ZMC) tan an pe a, an pekna lehkha chu nimin khan Health minister Dr R Lalthangliana an hlàn.

Minister chuan, an deptt-in ram an zawn rûk reng thu sawiin, "Hriselna lam ngaihtuah avanga ram zau tak Mual­lungthu khawtlang hruaitute'n ZMC an pe hi a lawmawm hle. VC leh khawtlang hruaitute bakah hma latu Bialtu MLA chungah lawmthu ka sawi a ni," a ti.

Muallungthu VC-te'n primary school leh middle school hmun danga an sak a ngaih dawn avangin a sakna turin Health Minister chu hma lakpui turin an ngen a; Minister chuan theihtawpa hma a lâkpui tur thu a hrilh.

Dr R Lalthangliana hian ZMC a tlawh nghal a, thawktute hmaah thu sawiin, "ZMC-a thawkte an positive avangin hun rei vak lo chu hna a kal chak thei lo. Catholic hotupa leh Montford School Principal ka bia a, ZMC-a thawktute awmna turin Montfort School kan dil a, min phalsak a, kan lawm hle a ni," a ti.

Health Minister hi Covid-19 Medical Operational Team chairman Dr ZR Thiam­sanga, MLA, bialtu MLA Prof. F Lalnunmawia, Health secretary R Lal­ramnghaka leh ZMC director Zohming­thanga ten an ṭawiawm a ni.