Sorkar laipui thu anga a thlâwna Buhfai sem tur peih a ni tawh

Covid-19 léng mek avanga mipui harsatna phuhrûkna atan sorkar laipui chuan May leh June thlaah buhfai a thlàwna sem turin a ruahmanna a, sorkar laipui ruahman anga May thla atana a thlâwna buhfai sem tur chu Mizoram sorkarin a tifel tawh.

Vanglaini palai zawh­na chhangin Food, Civil Supplies & Consumer Affairs (FCSCA) director Ramdinliani chuan, a thlàwna buhfai sem tur leh ration pangngai chu May 7, 2021-ah an tihfel tawh thu a sawi a, "Retailer-te hnena pek chhuah theih turin engkim tihfel a ni tawh. A thlàwna dawng turte hian retailer kaltlang thoin an dawng ang," a ti.

FCSCA Director sawi danin, buhfai a thlàwna dawng turte chu Antyodaya Anna Yojana (AAY) leh Priority Households (PHH) ration card neite an ni a, mi pakhatin kg. 5 zel a thlàwnin an dawng dawn. Hetih lai hian, PHH beneficiary-te hnena buhfai kg. 3 sem belh ṭhin chu May thlaah chuan sem tel a ni dawn lo.