Khua/veng mala Covid-19 vei tamna Chhinga Veng leh Tlabung dinhmun

Mizorama village council leh local council mal zingah Chhinga Veng, Aizawl chu Covid-19 vei enkawl lai tamna ber nia hriat a ni a, mi 180 vel an awm meka hriat a ni. Hetih lai hian, Tlabungah chuan nimin thleng khan hripui vei mi 105 hmuh chhuah tawh niin, chu'ng zinga 87 chu enkawl mek an ni.

Tlabung Village Task Force tarlan danin, tun thla May 1 aṭanga nimin thleng khan Tlabung khuaah Covid-19 positive mi 105 hmuh chhuah a ni tawh a, chu'ng zinga mi 19 chu chhuak tawhin, enkawl mek mi 86 an awm.

Tlabung Post editor Vanlal­hriatpuia Khiangte chuan, hripui vei an tam avangin Tlabunga covid care centre pathum chu a khat vek tawh tih a sawi a, "Kan CCC pathum hi mi 40 vel lenna a ni a, leng lo an tam tawh avangin eng emaw zat chu Lunglei lama CCC-ah hruai chhoh an ni. Tunah hian ZMC-ah sample test hmabak 415 a la awm," a ti.

Vanlalhriatpuia chuan, Tlabunga hmun ṭhenkhat chu containment area a nih mek thu te, Covid-19 positive leh inkhung ngai an tam avangin hripui donaa duty tur pawh an tlem tawh thu te, YMA branch-te'n volunteer tur an zawn thute a sawi bawk.

Chhinga Veng Local Task Force-in May 13, Ningani zana hripui chungchanga an veng dinhmun an tarlanah Covid-19 positive mi 236 hmuh chhuah a ni tawh a, enkawl lai mi 155 leh dama chhuahtir tawh mi 81 an ni. May 13-a swab sample endikna result nimin zinga IPR department-in an tihchhuahah Chhinga Veng mi 30 an awm. Nimin lama an dinhmun erawh an la tihfel loh thu an sawi.

Chhinga Veng LTF hruaitute chuan, Covid-19 donaa hma an lâknaah sub-committee panga an din a, chu'ngte chuan an hmazawn ṭheuhah hma an lak thu an sawi. Mipuiin thu an la awih tâwk lo tih sawiin, "Positive contact nei reng si, insawi duh lo an awm leh zauh ṭhin a, a hnuah an positive ve leh a, a lang chhuak leh tho ṭhin. Bazar area kan ni a, anmahni thua chawhmeh tithlenga an duh dana lo ti an awm ve leh ṭhin bawk," an ti.

LTF hruaitute sawi danin, Chhinga Vengah hian LTF, kohhran, bialtu MLA Robert Romawia Royte leh bialtu councillor B Lalawmpuii ten chhungkaw eng emaw zat hnenah chhawmdawlna an pe tawh a; veng chhunga mi eng emaw zatin LTF-ah thawhlawm an thawh tawh bawk.

May 12, Nilaini aṭang khan an venga KVM High School chu community covid care centre (CCCC0) atan an hmang ṭan a, an veng mi hripui veite awmin, LTF-in an enkawl. KVM H/S CCCC hi Covid-19 veite enkawl dan tur pangngaiah chuan mi 30 chuang hret awm theihna tur a ni a, mahse, mi 60 vel chu an indah lut thei turah an ngai a ni.