KHAWTHLIR

Hmanrua pe
May 13, Ningani khan district pathum - Saitual, Khawzawl leh Hnahthial damdawi-ina hman tur, Covid-19 vaccine dahṭhatna tur deep freezer pakhat leh ice lined refrigerator (ILR) pahnih thlenpui a ni. South Tuipui bialtu MLA Dr R Lalthangliana chuan Hnahthial district a VTF 31-te hnenah ṭanpuina eng emaw zat a pe bawk.

Oxygen regulator
Non-Government Hospital Medical Operational Team-te chuan nimin khan State Referral Hospital (ZMC)-a hman turin oxygen regulator 27 an hlân.

ICU-ah mi 15 awm
State Referral Hospital ICU-ah Covid-19 vei mi 15 enkawl mek an ni. SRH-ZMC Bulletin tarlan danin, SRH-ah hian nimin khan hripui vei mi 16 dah luh niin, mi 10 chhuahtir an ni a, mi 143 an awm mek. Mi 143 zinga 128 chu ward-ah an awm a, ICU-a awm mi 15 zinga 13 chu ventilator hmanga enkawl an ni.

CM Relief Fund
Electric Veng Presbyterian Kohhran chuan Chief Minister's Relief Fund for COVID-19 ah nimin khan Rs. 2,00,000 an pe a, Muthi MNF unit-in Rs. 5,000 an pe bawk.

Containment zone hlîp
Siaha khawpuia swab sample random test vanga Covid-19 positive hmuh chhuah, hri an kàina chin hriat lohte sûlhnu chhui hna zawh a ni tawh a; hei vang hian May 5, 2021-a Siaha khaw pumpui contaiment zone-a puan tawh chu bawrhsap Kesavan R-a'n nimin khan a hlîp.

Covid-19 vei thi
Lalduhawma (37), RS Palya, Bangalore-a chêng, hna thawka awm chu May 13, Ningani chawhnu dar 2 vel khan a chenna inah a thi. BMA hruaitute hnen aṭanga thu dawn danin, Lalduhoma hi Covid-19 vei a ni a, nimin khan BMCF ruahman angin vui a ni. Bangalore-ah hian Mizo zingah hripui vei mi 97 hmuh a ni tawh a, chu'ng zinga mi 48 chu dam takin an chhuak tawh a ni.