ASF vangin vawk 3,301 thi tawh

Mizoramah vawk pûl hri African Swine Fever (ASF) lênna infected area 74 a awm mek a, chu'ng hmunahte chuan ASF avangin nimin thleng khan vawk 3,301 a thi tawh.

Animal Husbandry & Veterinary (AH&Vety) department chhinchhiah danin, Mizorama district pasariha khua/veng 74-ah ASF a léng tawh a, chu'nga vawk vulh zat report an dawn chu vawk 11,436 a ni. Vawk 3,301 chu ASF vangin an thi tawh a, vawk 8,135 a la dam. Infectead area-a puan loh khua/ veng 29-ah chhan hriat lohin vawk 142 a thi tawh bawk.

ASF infected area hi Aizawl district-ah tam berin, khua/veng 41 a awm a, Sihphir leh Thingsulthliah tih loh khua/veng 39 chu AMC huam chhunga mi a ni. Lunglei district-ah ASF infected area 20 a awm a, Serchhip district-ah paruk, Mamit district-ah pali, Lawngtlai, Khawzawl leh Hnahthial district-ah pakhat ṭheuh a awm.

Tun hnaia Zokhawthar, Champhai district-a RAT hmanga vawk thi endik chu ASF vanga thi a ni tih finfiah ni tawh mah se, Zokhawthar chu infected area-ah puan a la ni lo. RAT-a finfiah tawh tissue sample chu RT-PCR hmanga endik nawn turin College of Veterinary Sciences & Animal Husbandry, Selesihah thawn a ni.

ASF infected area 74 zingah khaw khata vawk vulh zat aṭanga chhûta ASF vanga vawk thi tamna ber chu Mamit district-a Bajirungpa khua a ni a, vawk 85 an vulh zinga 76 (89.41%) chu ASF vangin a thi tawh a, vawk paruk erawh a la dam.

Mizorama ASF vanga vawk thi tamna ber leh vawk hri lèn ṭanna Lunglei district-a Lungsen khuaah chuan ASF vangin vawk 752 a thi tawh a; he khuaa vawk vulh zawng zawng 1,011 zinga 259 a dam a ni. Aizawl district ASF infected area 41 zingah Bawngkawnah ASF vanga vawk thi a tam ber. Bawngkawnah hian vawk 750 vulh zinga 178 (23.73%) chu ASF vangin a thi tawh a, vawk dam lai 572 an la nei.

Serchhip district-a infected area zingah East Lungdar khuaah vawk 765 vulhin, chu'ng zinga 23 (3%) chu ASF vangin a thi tawh a, vawk 742 a la dam. Lawngtlai district-a Chawngte khuaah vawk 829 an vulh a, chu'ng zinga 197 (23.76%) chu ASF vangin a thi tawh a, vawk 632 an la vulh mek.

Khawzawlah chuan vawk 1,145 an vulh zinga 73 (6.37%) chu ASF vangin a thi tawh a, vawk 1,072 an la nei. Hnahthial Chanmari vengah vawk 1,219 an vulh zinga pahnih (0.16%) a thi tawh bawk.