Covid-19 kaihhnawihah ṭanpuina pe

Deputy chief minister Tawnluia chuan nimin khan a bial chhunga inkhàrkhip vanga hna thawk thei lo, khawsak harsa zual nia ngaih chhungkaw 489 hnenah buhfai quintal 50.8 a pe. Buhfai hi Khawzawla chhungkaw 264 leh khaw dang 12-a chhungkaw 225 hnenah Khawzawl DC, task force leh khawtlang hruaitute'n an sem a ni.

Aizawl South-III bialtu MLA Prof. F Lalnunmawia pawhin nimin khan SRH-ZMC-a thawk nurse-te awmna tura buatsaih Montfort School-a hman turin mattress 40 a pe bawk. SRH-ZMC-ah hripui vei dah luh an pung zel a, thawktu nurse leh laboratory technician-te rawih belh an ngaih avangin, chu'ng mite awmna atan chuan Montfort School hman tum a ni a, nurse 40 awmtir phawt tum a ni.

Serlui bialtu MLA Lalrinsanga Ralte chuan nimin khan a bial chhunga Vairengte damdawi-in (CHC)-ah MLA fund aṭanga a lei ambulance a pe a; Phaisen, Saihapui-V, Phainuam leh North Chhimluang VTF-te tlawhin, pawisa, hmai tuamna leh kut tihfaina a pe bawk.

Hetih lai hian, Sanjay Kumar, Chaltlang chuan Durtlang BSUP CCC-a thawkte leh damlote tan nimin khan dawnfawh pum 150 (kg. 765.20), Rs. 38,260 man chu Horticulture department kaltlangin a pe. Amah hi hripui vei, hun eng emaw chen BSUP CCC-a enkawl hnua chhuak tawh a ni.