NH-6 laih mek dodaltute lakah Champhai NGO-in FIR an thehlut

National Higway no. 6 laih meka hna thawktute lakah buaina siam an awm avangin Champhai District NGO Coordination Committee chuan Khawzawl Police Station-ah FIR an thehlut. Kawngpui siamtute'n hna an thawh zui nghal theihna turin dîpdâltu awm apiang a ṭul anga thianfaia hnatlan ni se, an ti bawk.

NHIDCL hnuaia NH-6, Seling-Champhai kawngpui double lane ni tura laih mekah, Dulte leh Kawlkulh khuate'n hna thawktute lakah buaina an siam avangin nimin khan Champhai District NGO hruaitute chu Champhai MJA Press Club-ah an ṭhukhawm a ni.

Ṭhutkhawmah hian Champhai District NGO chairman Lalnunmawia leh secretary Muana Hangsing chuan NH-6 Puilo leh Chhawrtui inkara kal tur Green Field on New Allignment nihphung leh Kawlkulh leh Dulte khawtlangin duh lohna an lantir dan tlangpui an tarlang. Hna thawhna hmanrua lak luh tur dan beh tuma Kawlkulh khaw chhung, Puilo khaw pénga gate siam chu khawchhak tlangdung harsatna thlentu leh mipui hmuhsitna nia an ngaih thu an sawi.

Champhai NGO-te chuan, kawngpui laih mek tikhaihlak leh dodalna awm chu ṭha an tih loh thu sawiin, "Gateway of South East Nations kawng siam meka harsatna sukiang tur hian a tàwp thlenga ṭan lak a ni dawn. Hmalakna tiṭhuanawp tum emaw, dodaltute chu khawchhak tlangdung mipuite'n an hmachhawn zel ang. Kawngpui siamtute'n hna an thawh zui nghal theiha turin dîpdâltu awm apiang a ṭul anga thianfaia hnatlang neih ni se," an ti a ni.