ZPM-in dawnfawh thar ṭha lawmpui

ZPM party chuan thuchhuah siamin, Ngopa, Làmzáwl leh Pàwlráng khuaa chhungkaw eng emaw zatin Tuiphal leh Tuithil leiletah hlawhtling takin dawnfawh an thar chu an lawmpui thu an tarlang a, "Dawnfawh thartu, kut hnathawktu chhungkuate zahna chibai kan bûk a ni," an ti.

Mizorama thar ngei dawnfawh tam tak hmuhin rilru a tihlim hle tih sawiin ZPM chuan, "A ti tak tak tute tan chuan Mizoramah hlawhtlinna a awm a ni tih an lantir chiang hle," an ti a; a hralh hun lai taka lockdown vanga harsatna an tâwk chu pawi an tihpui thu sawiin, a remchan anga leisak turin mipui an ngen. Bialtu MLA L Thangmawia leh sorkar department-in theihtawp an chhuahpui chu lawmawm an tih thu an sawi.

ZPM chuan, an party policy lian ber chu, rim taka hna thawkte khai chhuahna tura a theih chin china hmalak a nih thu sawiin, ZPM an sorkar hunah kut hnathawktute chawikanna lam hawiin nasa taka ke an pên dawn thu an tarlang.

ZPM party chuan, "Mizoram ei leh bàra kan intodelh theihna tur leh kut hna thawka eizawngte'n an dinchhuah theihna tur tuipui a, puih an ngaih huna pui a, kaih an ngaih pawha kài thei tura sorkar a inbuatsaih a ngai a, bána kaih (hand holding) policy kan nei a ni," an ti.