Chhawmdawlna ngaihtuah rang turin phût

Mizoramah inkhuahkhirhna leh inkhàrkhip vanga ni 20 chuang mi náwlpui an inkhung tawh avangin harsatna tâwkte chhawmdawlna tur rang taka ngaihtuah turin Congress party chuan Mizoram sorkar an ngen.

MPCC chuan thuchhuah siamin, Mizorama mi náwlpui ni 20 chuang an inkhung hnuah total lockdown pawhsei a nih thu an tarlang a, "Total Lockdown puang lo thei lo dinhmuna kan din avang leh Covid-19-in min luhchilh nasat em avangin Mizoramah, a bikin Aizawl leh district khawpui dangahte ei tur nei mumal lo, harsatna nasa tak tâwk mek chhungkua sang tam tak kan awm tawh a ni," an ti.

Ni tina ei chawp dap chhungkua leh sumdawnna tênau nei tam takte sum lak luhna a tàwp avangin an buai mek tih sawiin MPCC chuan, "VTF/LTF-te'n mimal leh páwl hrang hrang aṭanga ṭanpuina an dawn aṭangin harsatna tâwkte tuamhlàwm hna an thawk mek a ni," an ti a; kohhran ṭhenkhat chuan an huam chhunga sorkar hnathawk awm lohna chhungkua, harsatna tâwkte hnenah ṭanpuina sum leh ei tur an sem mek thu an sawi.

Congress party chuan, dinhmun khirh takah mipui an awm mek laia chhuanchham mai thei tawh chhungkuate ṭanpuina tur Mizoram sorkar aṭanga ruahmanna a la awm lo chu hriatthiam harsa an tih thu an sawi a, "Chhawmdawlna hna task force kuta dah a, sorkar ber a kèl e âwl dêr mai hi hriatthiam theihah kan ngai lo. Sorkar hian chhuanchhama awm mek chhungkaw sang tam tak ṭanpuina tur ruahman thuai se, a ṭul a nih chuan CM, Finance Minister ni bawk phalnain Mizoram budget pawh siamrem mai rawh se," an ti.

MPCC chuan, mi harsate chhawmdawlna kawngah a ṭul anga sorkar thawhpui turin Congress party an inring reng tih an tarlang bawk.