Loneitute ṭanpuina scheme sawiho

Sorkar laipuiin loneitute'n kum khata Rs. 6,000 an dawn theihna tur scheme a duan, Pradhan Mantri Kisan Samman Nidhi (PM-KISAN) chu nimin khan prime minister Narendra Modi hoin video conferencing hmanga sawiho a ni a, Mizoram aṭangin Chief Minister aiawhin Agriculture minister C Lalrinsanga a tel.

C Lalrinsanga chuan, PM-KISAN hnuaiah Mizorama loneitu mi 1,90,002 an inziah luh tawh thu sawiin, "Chung zinga 1,49,933 chuan he hamṭhatna zár hi an zo tawh a, cheng vbc. 126 chuang an bank account-ah thun a ni tawh. Scheme hnuaia loneitute ṭanpuina hi thla li dan zelah kum khatah instalment thuma pek ṭhin a ni a, instalment khatah Rs. 2,000 zela pek an ni," a ti.

Agriculture Minister chuan, PM-KISAN hnuaia inziak lut hmasate'n instalment sarihna thlengin ṭanpuina sum an dawng tawh tih sawiin, "PM-KISAN hnuaiah hian chhungkuaa member pakhat chauh hmingin hamṭhatna hi dawn tur a ni," a ti a; chhungkaw ṭhenkhat aṭanga hming pakhat aia tam inziak lutte chu endiknaah paih theih an nih thu a sawi.

PM-KISAN hnuaiah Mizorama loneitu eng emaw zat inziak lut tawh si, ṭanpuina la dawng lo an awm tih sorkarin a hriat thu sawiin C Lalrinsanga chuan, "Heng mite hian an dawn theih ngeina turin kawng kan dappui mek. Harsatna an tawh chhan ber chu Aadhaar card dik loh vang te, bank account dik loh vangte leh bank account IFSC code dik loh vangte a ni ber," a ti.

Sawihona hunah hian Agriculture Minister hi secretary J Hmingthanmawia leh director Rohmingthangate'n an ṭawiawm a ni.