Covid-19 vei hmuh thar zingah Upa aiin naupang lam an tam

May 15, Inrinni khan Health minister Dr R Lalthangliana hoin Covid-19 thawh hnihna léng mek thlirho a ni. Meeting-a tarlan danin, Covid-19 thawh hnihnaah hian hripui vei hmuh chhuah zingah kum upa lam aiin naupang lam an tam zawk.

Health Minister chuan, Covid-19 thawh hnihna chu nikum lama mi nen a ziaráng leh a thawh dan a danglam tih sawiin, "Positive hmuh chhuah tawh zingah case dangdai tak takte an awm bakah, kan la hriat ngai loh thil chi hrang hrang a ken tel avangin kan data neih ang ang aṭangin a zia hi kan zir chian a, thûk zawka kan luhchilh a ngaiin a lang. Hripui kan hmachhawn zel dan tur leh hun lo kal zel turah chêt lak dan tur kan hriatthiam theih nan a pawimawh a ni," a ti.

Meeting chuan hripui zirchianna uluk taka nei turin research team din an rel a, Integrated Disease Surveillance Programme (IDSP), Indian Medical Association (IMA), ZMC leh Mizoram University-a mithiamte an tel ang. A ṭul anga ruahmanna siam nghal tura tih a ni.

Covid-19 veite an negative hnua natna (symptom) nei leh si an awm thei nia a lan thu leh Covid vaccine dose la kim tawh zingah positive an awm thu meeting-ah hian tarlan a ni a; chumi chungchang chu research team din turin uluk taka an zir chian atan an dah.

Police contact tracing team-in an tarlan danin, May 1-14 inkar chhungin Mizorama khua/ veng 65-ah Covid-19 positive hmuh chhuah a ni a, hmuh tamna ber Chhinga Vengah mi 179 hmuh a ni. Hripui vei hmuh chhuah zinga mi 915 chu natna (symptom) lang chhuak an ni.

Hetih lai hian, May 1-3 inkarah chhungkaw khata a ruala positive pakhat aia tam hmuh chhuahna chhungkua 292 an awm.

IDSP report-a a lan danin, kumin April 1 aṭanga May 14 thlengin Covid-19 positive 4,023 hmuh chhuah a ni tawh a, chu'ng zinga mi 1,173 chu Mizoram páwn aṭanga lut (travel history nei) niin, mi 2,850 chu Mizoram chhunga kái chhâwng an ni.

Mizorama Covid-19 positive hmuh chhuah tawh zawng zawng zinga 95% chu civil mi an ni a, force lam mi 5% an awm bawk.

Ṭhutkhawmah hian Covid-19 Medical Operational Team chairman Dr ZR Thiamsanga, MLA, chief secretary Lalnunmawia Chuaungo, Health secretary R Lalramnghaka, DMR secretary Lalbiaksangi, DIG (NR) Lalbiakthanga Khiangte, ZMC hotute, IMA leh Non Govern­ment Hospital Association hruaitute an tel a ni.