Vawiinah kum 18-44 inkarte Covid vaccine pe ṭan dawn

Mizoram sorkar chuan vawiin aṭangin kum 18-44 inkarte hnenah a thlàwnin Covid-19 laka invènna damdawi (vaccine) Covi­shield a pe ṭan dawn.

Covid vaccine hi Health & Family Welfare department-in kum 18-44 inkar zinga ngaih pawi­mawh hmasak tura a dahte pek hmasak a ni dawn a, ngaih pawimawh hmasakte pek chhungin mi dang hnenah pek a ni rih dawn lo a, private hospital-ah pawh lak theih a ni rih dawn lo.

Vaccine la turte CoWin (selfregis­tration.cowin.gov.in)-ah inziah luh tur a ni a, an lâk hma ni hnihah an hming, phone number leh hruaitute hming 'mizoram.nhm@gmail.com'-ah thehluh tur a ni. Vaccine lak dáwnah Aadhaar card, voter ID leh mahni thawhna ID-te ken a ngai bawk.

Vaccine pek tur chung­changah hian a ṭul angin ASIO Dr Lal­thantluanga phone number 9612166240-ah biak theih a ni.

Health deptt-in rua­hman­na a siam dan chuan, vaccine hi Aizawl West CMO chuan Kulikawn YMA Hall-ah an pe dawn a, Aizawl East CMO chuan Ramhlun LC House-ah an pe ang. Bawnghnute semtute chu vaccine pekna pahnihah hian an remchan dan angin Aadhaar card kenga kal tur a ni.

Kum 18-44 inkar zinga pek hmasak turte dawn tur vaccine chu sorkar lai­puiin a rawn pek a ni a, mi náwlpui pek tur erawh chu Mizoram sorkarin vaccine siamtu company hnenah a chah tawh a, nghah mek niin, pek theih hun tur hriat theih a la ni lo.