PAHOSS-ah mi 21 an inhnûkdâwk Mi 11-in parking house an sa zo tawh

Aizawla lirthei dahna sakna tura scheme siam, Parking House Support Scheme (PAHOSS) aṭanga in sak ṭanpuina dawng zinga mi 21 chu an inhnûkdâwk. Hetih lai hian, mi 11 chuan parking house an peih tawh.

PAHOSS hnuaia ṭanpuina dawng tura thlan tawh mi 21 chu an inhnûkdâwk leh a, ṭanpuina la dawng lo vek an ni a, an inhnuh­dawh chhan hriat theih a ni lo.

UDPA department hotute sawi danin, PAHOSS hnuaia in sa zo tawh mi 11 chu UDPA-in a pawmpui tawh.

In sa zo hmasa ber chu R Zosiamliana, Bawngkawn Bazar a ni. Chutih rualin, Parking house sa zo tawh, UDPA-a inhriattir tawh mi pakua chu sorkar sum harsat avangin PAHOSS Executive Committee chuan final instalment a la pe thei lo a, la endik leh tura dah rih a ni thung.

PAHOSS chu mipui tan ṭangkaia hman tura duan a ni a, CCTV dah vek tur a ni. Selection a fel zawk nan leh puipun nikhuaah a neitute leh lirthei dah turte'n an inhriat pawh awlsam theih nan mobile apps siam tur a ni.

UDPA hotute chuan, Covid-19 lèn hnuah sum harsat avangin PAHOSS atana thlan tawh hnenah cheng nuai 150 vel chauh an pe thei nia sawiin, "Sorkar sum harsatna thlen phahna tur khawp a ni loah kan ngai," an ti a; sorkar sum harsat avangin beisei anga hmalak theih a nih loh thu leh tunah hian Finance department-in PAHOSS sum K-Deposit-ah cheng nuai 4,987 a dah thu an sawi.

In sa zo hmasa ber leh parking atana hman tawh neitu R Zosiamliana, Bawngkawn chuan, , "Motor dah tur a leng lo. Mipuiin an chhawr khawp mai. Sorkar zarah mipui rawng kan báwl veah ka ngai," a ti a, a in sakah hian LMV 14 leh two wheeler paruk dah theih a ni.

PAHOSS dawngtu K Lalduhawmi, Republic Vengthlang chuan, "In kan sa a, PAHOSS dil ve turin min ti a, kan hmu ve ta a. CCTV nena a awm hi thlamuang takin an dah theih phah a, lirthei dahna nei lo tam takin kan dah theih phah a, inkhawmpui velah pawh a ṭangkai dawn hle," a ti a; ṭanpuina a dawn angin LMV 12 leh two wheeler 72 dah theihna tur a nih thu te, LMV a khah nghal thu leh two wheeler 39 dah nghal a nih thu a sawi.

UDPA Secretary-in May 16, 2019-a hriat­tirna a tihchhuahah chuan, PAHOSS ṭanpuina in sakte chu parking atana hman a nih aṭangin a tlem berah kum 10 chhung tal lirthei dahna (parking) atan hman tur a ni.