KHAWTHLIR

Thisen pe
KṬP, Dawrpui Branch chuan AVBD ngenna angin May 15, Inrinni khan Dawrpui Multipurpose Hall-ah thisen pek an huaihawt a, mipa 58 leh hmeichhia pakuate'n Aizawl Civil Hospital tan thisen unit 67 an pe. Lawngtlaia ṬKP unit pahnih Immanuel Unit leh Zion Unit-te pawhin District Hospital-ah thisen unit 14 an pe a, petute mipa 12 leh hmeichhia pahnih an ni.

Kohhranin tanpui
Chawnpui Presbyterian Kohhran chuan May 15, Inrinni khan Chief Minister's Relief Fund for COVID-19 ah Rs. 1,00,000 an thawh. Mission Veng Kohhran pawhin Aizawla Covid-19 vei mek tamna berte zinga mi leh containment zone-a puan mek Bethlehem Vengthlang mipui ṭanpui nan LTF hruaitute hnenah Inrinni khan Rs. 1,00,000 an hlân bawk.

Hmanrua thleng
May 15, Inrinni khan Khawzawl Hospital-ah damdawi chi hrang hrang vawn ṭhatna deep freezer pakhat leh ice lined refrigerator pahnih chu Khawzawl thlenpui a ni. Khawlte hi Khawzawl Hospital tualah bawrhsap Zothanmawia hoin sorkar hotute'n an lo dawngsawng.

ICU-ah mi 17-in Ventilator hmang
State Referral Hospital (ZMC)-ah nimin tlai dar 5 thleng khan Covid-19 vei mi 144 enkawl mek a ni a, chu'ng zinga mi 18 chu ICU-ah an awm. SRH-ZMC Bulletin tarlan danin, SRH ICU-a enkawl mek mi 18 zinga 17 chu ventilator nen enkawl an ni a, ward hrang hrang mi 126 enkawl an ni. Nimin khan hripui vei mi 11 dah luh an ni a, mi 10 chhuahtir an ni thung.