Dawr hawn dan tur ruahmanna siam
Aizawl district bawrhsap Dr Lalhriatzuali Ralte chuan, Aizawl Municipal Corporation huam chhunga May 18, Thawhlehni leh May 21, Zirtawpnia eichawp dawr, thlai, chawhmeh leh sa zawrhnate hawn dan turah thuchhuah a siam a; bazar lûn laiah aurinna hmanga mipui kaihruai turin veng tina task force-te a ngen.
Aizawl Bawrhsap chuan, local task force hruaitute chu an veng chhung ṭheuhah bazarna hmun âwl zau ṭha (kawngpui / sikul compound, etc) ruahman tur te, bazar nan lirthei hman a nih lohna tura hma la tur leh ft. 6 kar dana dawr siam a nih theih nana ruahmanna siam turin a ngen a ni.
AMC area-a eichawp dâwr, thlai, chawhmeh leh sa zawrhna hawng turte chu a hma ní, Thawhṭanni leh Ningani zan dar 8 leh zanlai dar 12 inkarah an thil zawrh turte an la khawm ang a; an chhuah ṭanna hmun leh an kalna tur mumal taka ziah tarlanna LTF/VTF lehkha an neih a ngai thung.
Curfew hun chhung (zan 7 - zing dar 4)-in wholesale dawr, veng chhunga zawrh tura a hlâwma lâkna/distributor bak, mipui lei tura dawr hawn/in zawrh/chawhmeh hralh khap a ni.