Ram hruaitute'n ṭanpuina an sem

Covid-19 dona leh hun eng emaw chen inkhuahkhirhna leh inkhârkhip kalpui a nih tawh avangin ram hruaitute ṭanpuina leh chhawmdawlna lam buaipuiin an che chhuak.

Home minister Lalchamliana chuan, May 14, Zirtawpni khan a bial Hrangturzo constituency chhunga North Vanlaiphai VTF hnenah personal protective equipment, oxymeter, kutkawr, kut tihfaina, damdawi, buhfai, chawhmeh leh Rs. 10,000 a pe a; Bungtlang VTF hnenah hmai tuamna, kut tihfaina leh Rs. 3,000 a pe. Health minister Dr R Lalthangliana'n N Vanlaiphai VTF hnenah oxygen concentrator a pe bawk.

Minister of state Lalruatkima chuan a bial Aizawl West-II chhunga local task force-te a tlawh kual a; Vaivakawn, Tuikual North leh Tuikual South hnenah hmai tuamna leh Rs. 50,000 ṭheuh a pe a, Kanan Veng, Dawrpui Vengthar leh Dinthar hnenah PPE, hmai tuamna leh Rs. 50,000 ṭheuh a pe. Vaivakawn Police Station-ah mask leh PPE a pe bawk a ni.

Mizoram Youth Commission (MYC) chairman Dr Vanlalṭanpuia chuan a bial, Lunglei North huam chhunga khaw pasarih tlawhin, village task force-te hnenah mamawh chi hrang hrang a pe. MLA hian Rs. 55,000 a pek bakah hmanraw chi hrang hrang a pe a; tuizem Zote South-ah 10, Chhipphirah 15 leh Bualpuiah 10 a pe nghal.

AMC Ward No. XII bialtu councillor R Thanglura, dy. mayor pawhin Inrinni khan an ward chhunga veng pathum Dinthar, Tuikual North leh Tuikual South LTF-te hnenah Rs. 10,000 ṭheuh leh mask leh sanitizer a hlan.

ZPM consultant F Rodingliana pawhin Tuikual North LTF hnenah buhfai, dailuah leh artui ṭhahnem tak a pe bawk.