Covid-19 donaah MNF-in lawmthu an sawi

MNF party chuan thuchhuah siamin, Covid-19 donaa theihtawp chhuahtu zawng zawng chunga an lawm thu an tarlang a, "Pathian zarah kan do hneh thuai kan beisei," an ti.

MNF chuan, hun khirh leh harsaah chief minister Zoramthanga kaihhruai MNF sorkarin ram leh mipui tan hma an la zel tih tarlangin, "Chief Minister, Health Minister, minister, MLA-te leh MNF AMC councillor-te'n an bial ṭheuh leh ram pum tana an inpekna leh thawhrimna hi lawmawm kan tiin kan chhuang tak zet a ni," an ti a; mipui pawhin sorkar hmalakna an zawm ṭhat thu an sawi.

Hriselna lama thawktu te, police te, department hrang hrang te, ZMC, CCC leh CCCC-a thawk te, task force, kohhran leh Covid-19 dona atana CM Relief Fund-a thawhtu zawng zawng chungah lawmthu sawiin MNF chuan, "Mipui kan him theihna tura thawktu hrang hrangte tan leh hripui a kian theih nan báng loa ṭawngṭai zel turin mipui kan sáwm a ni," an ti.

MNF chuan, hnam anga ṭan rual hun a nih thu tarlangin, "Thawktu hrang hrangte'n mutmu pawh tuah hman loin, a thim a vár pawh thlu loin mipui kan him theih nan an thawk reng a ni. Hetih lai hian, thawktute tihsual palh lo châng ràn a, mahni party hamṭhatna tura thu lo vaivir chíng an awm ve ṭhin," an ti a, tihsual châng rànte chu an thu ngaihdan tâwk thiam turin mipui an chah.

MNF party chuan, thil sawisel àwm a awm thei tih tarlangin, "Chutih rual chuan, a nazawnga pir tur zawngte thu leh hla hi chu ngaihdan tawk i thiam ang u. Sorkar thupek kan zawm ṭhat a, thawktute leh mipui kan ṭan rual ṭhat zel chuan hripui hi Pathian zarah kan do hneh thuai ang a, nunphung pangngaiin kan kal leh thuai ang tih kan beisei tlat a ni," an ti.