Mipuiin ni tin mamawh an chhêk khâwl

Mizoram sorkarin COVID-19 laka Mizoram mipui an him theih nan inkalpawhna kawng ṭhenkhat a khâr avangin mi tam takin ni tin mamawh an chhêk khâwl. Chief secretary Lalnunmawia Chuaungo chuan mipui ni tin mamawh chatlak loa lak luh zel a nih thu a sawi a, Mizoram sorkar pawhin Mizoramah COVID-19 vei hmuh a la nih loh thu leh chî-âina tur a awm loh thu a tarlang.

March 9, Thawhṭannia chief minister Zoramthanga hoa minister, sorkar official leh pawl hrang hrang aiawhte ṭhukhawmin Mizorama international boundary leh state dang nena inkalpawhna kawng ṭhenkhat khuahkhirh an rel avangin mi tam tak an chî-âi a; buhfai, dailuah, chini leh thil dangte an lei khawm nasa hle a, dawr ṭhenkhat chuan ni tin mamawh bungrua an hralh zo tawh a ni.

Hetihlai hian Mizoramin bungrua a lakluhna kawngahte dan pangngai anga bungraw phurh luh theih reng a nih tho avangin, bungraw phurh luh kawngah harsatna a awm lo. March 9, 2020-a Chief Mi­nis­ter hoa meeting-in a din State Level Task Force on Mitigation of Coronavirus (COVID-19) chu nimin khan an chairman Lalnunmawia Chuaungo, chief secretary hoin Aizawl SP conference hall-ah an ṭhukhawm nghal. Chief Secretary chuan, COVID-19 vanga chî-âi lo turin mipui a chah a, "Tun thlengin Mizoram mipui zingah emaw, Mizoram rawn tlawhtute zingah emaw COVID-19 natna kai hmuh chhuah an la awm lo," a ti.

Ni tin mamawh khaihlak tur anga thuthang chu belhchian dâwl lo a nih thu sawiin Lalnunmawia Chuaungo chuan, "Ni tin mamawh buhfai, gas, petrol leh diesel-te pawh stock a tam tâwk a, heng mamawh thilte hi chatlak loa lak luh zel a nih avangin harsatna tur a awm lo," a ti a; buhfai phei chu thla thum tla Mizorama kudam hrang hrangah dah khawm sa a awm thu a sawi. Chief Secretary chuan, mipui mamawh phurtu lirtheite chatlak loin Mizoramah an lut reng tih sawiin, "Hetih lai hian, he natna hrikin Mizoram a thlen lohna tur erawh chuan uluk leh khauh taka hmalak a ni. Ruahmanna hrang hrang chipchiar taka duan a ni," a ti.

Sorkar hotute ṭhukhawm chuan, ṭul bik thilah tih loh chuan Mizoram páwna zin chhuak tlem turin thurawn an pe a, sorkar department zawng zawngte chu puipunna lian tham - conference, kût leh thil dang siam rih lo tura tih an ni. Kohhran leh pawl dangte pawh hun eng emaw ti chhung chu a theih chin chinah inkhawmpui lian tham ko rih lo turin an ngen bawk. Vanglaini palai zawhna chhangin Food, Civil Supplies & Consumer Affairs director Dr Lalhriatzuali Ralte chuan, eirawngbawlna gas, petrol, diesel leh buhfaite a pangngaiin Mizoramah a luh reng thu a sawi a, "Kawng laka rawn thang mek pawh eng emaw zat a awm. IOC hotute nen pawh kan inbe reng a, harsatna a awm loh thu an sawi. Mipui tan chîâina tur a awm lo," a ti.

Mizoramin ni tin mamawh a lâk luhna ber Vairengtea lirthei veivâkte chhinchhiahtu Vairengte police checkgate-a duty-te chuan Vanglaini palai  zawhna chhangin, bungraw phur lirthei veivâk ni dang nen a inzat vel reng tih an sawi.

Mizoram sorkar chuan nimin khan thuchhuah siamin, kawng hrang hrangin COVID-19 laka inven­na buaipui mek a nih thu a tarlang a, "Mizoram chhungah COVID-19 vei case pakhat mah a la awm lo. Vei an awm anga social media-a thehdarh­tute pawh Mizoram police-te'n an chhui mek a, thubuai siamsak an ni dawn," a ti.

Sorkar thuchhuah chuan, "COVID-19 vang hian chî-âina tur a awm lo. Zin vei­vahna kawng ṭhenkhat khâr ni mah se, bungraw mamawh phur erawh chu a pangngaiin a kal reng dawn. Eichawp leh ni tin mamawh dang inchhêk khâwl lâwk a ṭul lo a, bungrua a toa zawrh leh chhehrelh phei chu khap tlat a ni," a ti a; thil dik lo tite chu hrem an nih tur thu a tarlang.