Swab test tih thuah lo turin ngen

COVID-19 chungchanga sorkar thupuangtu leh state nodal officer Dr Pachuau Lalmalsawma, State Field Laboratory Unit leader ni bawk chuan May 15, Inrinni khan mipui hnena thuchah a tichhuak a; RT-PCR result nghak laite chu an result chhuah hmaa sample test dang (RAT) tih thuah lo turin a ngen.

Dr Pachuau Lalmalsawma chuan, test chi hnih tihin mi pakhat aṭangin Covid-19 positive result inthuah (double case) a awm phah ṭhin thu a tarlang a, "Hei hian Covid-19 result buatsaih leh tihchhuah kawngah harsatna lian tak a siam avangin RT-PCR result nghak laite chu páwna chhuak loa mahni awmnaa tawm tur leh, result an hriat hma chuan sample test chi dang ti rih lo turin kan ngen a ni," a ti. Result nghah laia Covid-19 symptom neite chu an awmna task force-ah inhriattir vat turin a chah nghal.

Task force leh sorkar contact tracing team-te ṭha taka thawhpui tura mipui sáwmin Dr Lalmalsawma chuan, "Zawhna kan dawnte huaisen tak leh zêp nei loa chháng a, ṭha taka lo thawhpui turin kan inngen a. State dang aṭanga Mizorama lo haw turte chu theihtawpa fimkhur a, mahni awmna bula mite chu Covid-19 positive anga ngaia Covid appropriate behaviour anga fimkhur a pawimawh," a ti.

Hmun dang aṭanga Mizorama haw turte chu an haw hmain RT-PCR/TrueNAT/CB-NAAT hmanga an swab sample an endik a nih chuan, an result hre ngeia haw tum turin a chah bawk.