Total lockdown kalpui dan tur rêl

Mizorama total lockdown kalpui mek chu May 24, 2021 zing dar 4 thleng pawhsei a nih avangin, Champhai leh Khawzawl district-a thuneitute chuan an district-a inkhàrkhip kenkawh dan tur May 15, Inrinni khan an rêl.

Champhaiah chuan IPR Auditorium-ah District Task Force on Covid-19 chu an chairman Maria CT Zuali, bawrhsap hoin an ṭhu a, Champhai SP Lalrinpuia Varte, additional DC Henry C Lalrawnkima leh Champhai khaw chhunga village task force aiawhte an tel. Sorkarin ruahmanna a siam zinga ṭhenkhat chu Champhai khawpuia hman turin an siamrem a ni.

Khawzawlah chuan DC conference hall-ah bawrhsap Zothanmawia hoin Inrinni khan Covid-19 executive team leader-te an ṭhukhawm a, "Sorkar inkaihhruainate ṭha taka ken kawh chhunzawm ni se, Khawzawl khawpui chu African Swine Fever inffected area-a puan a nih tawh avangin total lockdown laia sa leh thlai zawrh ní-ahte vawk talh leh a sa zawrh chu khap chhunzawm ni se," an ti.

Khawzawl district-a Covid-19 executive duty-te'n April 20, 2021 aṭanga May 15, Inrinni thleng khan dan leh thupek zâwm lo mi 193 an man tawh a, pawisa an chawitir tlingkhawm zat chu Rs. 39,800 a ni.