Serchhip MJA-in chak zawka DLTF kalpui turin DC an ngen

Serchhip District MJA chuan, Covid-19 avanga total lockdown puan mekah chak zawka Serchhip District Task Force kalpui tawh turin Serchhip DC Kumar Abhishek an ngen.

Serchhip District MJA hruaitute chu May 15, Inrinni khan Serchhip Press Club-ah an ṭhukhawm a, total lockdown kalpui mek chungchang an thlir. Inkhàrkhip kalpui dan chu rualkhai lo hlea an hriat thu tarlangin, "Total lockdown kalpui a nih dan a rualkhai lo hlein kan hria, hei hi a chhan chu District Task Force mumal loh vangah kan ngai," an ti.

Serchhip khawpuia veng hrang hranga village task force hmalak dan pawh a rualkhai lo tih sawiin Serchhip MJA chuan, "VTF-te duty dan tur leh an thuneihna chin mumal takin SOP duansak a ṭul," an ti a, village task force-te remtih leh remtih loh chin a inan loh thluah thu an sawi.

Serchhip MJA-te chuan, state sorkarin SOP a duan zûlzuia an district-in rualkhai leh mumal taka an hman tlàn tur SOP duang mai turin DC an ngen a ni.