Thu dik lo thehdarhtu Mi 11 man

COVID-19 chungchanga thu dik lo thehdarhtua puh mi 11-te chu nimin khan police-te'n Aizawlah an man a, mi dang inhnamhnawihte pawh man tumin an chhui zui mek.

Police thuchhuah tarlan dan in, March 9, Thawhṭanni khan Whatsapp-ah, 'Ka hmelhriat hnaivai Health Dept (Civil Hosp) a thawk aṭanga chanchin ka hriat dan in, tunah hian COVID-19 confirm case pakhat Aizawlah vawiin khan hriat a ni a. Kan chhungte leh ṭhian ṭhate kan lo fimkhur nan i inhrilh ang u’ tih leh, ‘Breaking news ITI Vengah COVID-19 suspect a awm a nia. Singapore aṭanga lo haw. Referral Hospital-ah dah an tum a, mahse an duh lova, nichin mai khan an phur phei dar 3:00 vel a niang. Ka chhuahna ṭanga ka rawn hriat,' tihte chu thehdarh a ni.

Whatsapp-a thu thehdarh chu police-in an chhui zui nghal a, COVID-19 vei nia an sawi pawh zawn chhuah a ni. Amah chu hmeichhia kum 31 mi, March 2, 2020-a Singapore aṭanga lo haw a ni a, a haw kawngah Kolkata leh Lengpui Airport-ah endik a ni a, harsatna a nei lo. COVID-19 vei lan chhuah dan angin awm lo mah se, Singapore aṭanga haw a nih avangin páwnchhuak rih lo turin thurâwn pek a ni. Whatsapp-a thu dik lo post-tu leh post chhâwngtu mi 11-te chu nimin khan police-in an man a, Vaivakawn Police Station-ah IPC Section 505(1)(b) tlawhchhanin thubuai ziah luh a ni. Police thuchhuah chuan, thu dik leh dik lo thliar hrang loa thu dawnte post chhawn (forward) zung zung chu danin a phal lo tih tarlangin, fimkhur turin mi tin an ngen.