Women Helpline Mizoramin thubuai 914 an khawih tawh
Universal Women Helpline, Mizoram chuan kum 2016 aṭanga kumin February thla thleng khan call 5,081 an dawng a, chu'ng aṭang chuan case 914 an buaipui. Kum kal mek, 2019-20 chhung bikah call 1,410 dawngin, case 247 an khawih.
Women Helpline report-a a lan danin, Women Helpline hian July 2016 aṭang khan Mizoramah hna an thawk ṭan a; mipuiin an hmelhriat tial tial a, hna an thawh aṭangin kum tin anmahni dawrtu an tam tial tial a ni. Women Helpline hian kum 2016-17 chhung khan call 812 dawngin, case 146 an khawih a, kum 2017-18 chhungin call 1,320 dawngin, case 212 an khawih. Kum 2018-19 ah chuan call 1,539 dawngin, case 309 an buaipui a, kum kal mek 2019-20 chhungin, February 2020 thleng khan call 1,410 dawngin, case 247 an khawih tawh a ni.
July 2016 aṭanga February 2020 thlenga call an dawn tawh zawng zawng 5,081 zinga 2,851 chu ṭanpuina mamawhtu ngeiin a biak a ni a, 2,230 erawh chu mi dang kaltlanga call an dawn a ni. Hemi chhung veka case an khawih 914 zinga a tam zawk, 618 chu Aizawl khawpui chhunga mi a ni a, a bâk 296 chu Aizawl páwn lama mi a ni thung. Women Helpline centre-a case an ziah luh 914 zinga 118 chu emergency case a ni a, 796 erawh chu emergency case a ni lo. Inchhung khura buaina (domestic violence case) 501 a awm bawk.
Domestic violence bikah hian physical violence (tharum thawhna/kut inthlakna) tam berin, case 316 a ni a; a dangte chu - ṭawngkaa intihduhdahna (verbal violence) case 238, financial case 36, sexual case 45, extra marital affair case 93 leh a dangte 141 a ni. Domestic violence case ni lote chu - cyber case 49, eve-teasing 10, stalking 11, assault 32, defamation 49, threat/accusation 46, sexual abuse 40 leh a dang 134 a ni.
Case an khawihte dinhmun chu - pasal ṭhen tawh 208, pasal nei lai 352, hmeithai 57, pasal nei leh tawh pali, pasal la nei lo 253, mipa nena khawsa dun (live-in) 20 leh chian loh (unspecified) 20 an ni. Case-a an client-te chu - kum 10 hnuai lam mi 16, kum 11-20 inkar mi 140, kum 21-40 inkar mi 526, kum 41-60 inkar 163, kum 61 leh a chung lam mi 16 a ni a; kum hriat chian loh mi 52 an awm bawk. Women Helpline Mizoramin case 914 an khawih zinga a tam ber - case 909 chu chingfelin an titawp tawh a, case kal mek panga an la nei mek a ni.