CYMA-in tito lo tur leh chheprelh lo turin sumdawngte an ngen

Central YMA chuan thuchhuah siamin, COVID-19 vanga Mizoram luhna kawng ṭhenkhat khâr rih a nih dawn vangin mipui mamawhte a man pangngai aia sanga hralh lo tur leh chheprelh lo turin sumdawngte a ngen a, mipui pawh an mamawh aia tam lei lo turin a ngen nghal.

CYMA chuan, Mizoram luhna kawng ṭhenkhat khâr rih a nih vanga thil man tihto a nih loh nan YMA sub-headquarters, group leh branch tinte chu an huam chhung ṭheuha hma la turin a ngen a, "YMA sub-hqrs, group leh branch-te'n sorkarin ruahmanna a siamte ṭawiawm turin kan ngen a ni. He hri léng vanga chî-âi lo tur leh sorkarin ruahmanna a siamte zâwm turin kan ngen a ni," an ti.

Central YMA chuan, Corona­virus laka invenna atana Mizoram sor­karin ramri inkalpawh tawnna a khuahkhirh chu lawmawm an tih thu a tarlang bawk. Mizoram Merchant Association (MIMA) pawhin thuchhuah siamin, COVID-19 vanga buaina thleng mekah, sumdawngte chu an bungrua khawl sa a man pangngai aia ti to lo turin an ngen. Hetih lai hian, Aizawla veng tam takah local council leh YMA-te chuan an veng chhungah a man pangngai aia toa mipui mamawh hralh phal a nih loh thu hriattirna an tichhuak bawk.