Thlai lei khawm duh task force-te tan Horticulture-in ruahmanna an siam

Horticulture depart­ment chuan nikuma Covid-19 lèn laia Vege­table Supply Chain kalpuia thlai an zawrh angin tuna hripui léng mekah thlai an zuar tawh dawn lo a, ruahmanna thar an siam thung.

Vanglaini palai zawhna chhangin Horticulture director Elizabeth Saipari chuan, chawhmeh an zawrh tawh dawn loh thu a sawi a, "Thlai leh thei hralhna zawn hi kan kut ni chiah loh mah se, total lockdown avangin loneitute'n harsatna an tawh avangin kan buaipui lo thei lo. Kumin­ah erawh chuan kei­­mahni'n thlai kan zuar tawh dawn lo a, task force-te tan erawh rua­hmanna kan siam," a ti.

Horticulture Direc­tor sawi danin, an depart­ment chuan Aizawl, Kolasib, Serchhip leh Mamit district chhunga thlai, a hlâwma hralh thei tur an zawng chhuak a, chungte list chu district pali DC leh AMC hnenah an pe a ni. DC-te leh AMC chuan task force-te hnenah thlai, a hlâwma hralh theite biakpawhna an pe chhawng ang.

Hetih lai hian, Horti­culture department hian total lockdown avanga dawnfawh hralhnaa harsatna tâwk Ngopa, Làmzáwl leh Pàwlráng khaw mite chu tunlai hian an buaipui.

Dawnfawh thartute chuan an dawnfawhte Aizawlah phur thlengin, Horticulture department chuan a hralhna tur an ngaihtuahsak a; an office bul aṭanga hralh chhuah a nih bakah, a hlâwma lei duh zawnsakin, an motor-in an peksak ṭhin a ni.